SHIRIKA LA HALI YA HEWA DUNIANI LIMEUINGIZA MLIMA KILIMANJARO KATIKA NCHI ZENYE MILIMA YENYE BARAFU

 

 Mkurugenzi wa Mamlaka ya Hali ya hewa Tanzania Bi,Agness Kijazi wakati akiongea na waandishi wa habari katika mkutano wa shirika hilo utakaofanyika kwa siku tatu mkoani Arusha

 Na Mwanaid Bundala,Arusha.

SHIRIKA la Hali ya Hewa duniani limeuingiza Mlima Kilimanjaro katika nchi zenye milima yenye barafu (tropicsmom) ambapo ni moja ya uratibu wa shirika hilo.

Hayo yalisemwa jana mkoani Arusha na Mkurugenzi wa Mamlaka ya Hali ya hewa Tanzania Bi,Agness Kijazi wakati akiongea na waandishi wa habari katika mkutano wa shirika hilo utakaofanyika siku tatu mkoani hapo.

Alisema kuwa katika majadiliano yaliyofanywa na shirika hilo waliona ni vema Tanzania ikaingizwa katika nchi hizo kupitia mlima Kilimanjaro kutokana na barafu inayopatikana katika mlima huo.

"Katika program ya hali ya hewa kupima maeneo yenye barafu tutafikia makubaliano ya kuweka kituo katika mlima Kilimanjaro ambacho kitaingizwa kwenye hii program na mtaalamu mmoja wa Tanzania kutoka Mamlaka ya hali ya hewa ataingia katika utafiti kama mjumbe katika shirika hili ili kuangalia maeneo yenye barafu pamoja na kufanya vipimo vya hali ya hewa duniani"alisema Bi Kijazi.

Aliongeza kuwa moja ya faida ya mlima huo kuingizwa katika nchi hizo ni pamoja na kusaidia kufahamu sababu za kupungua kwa barafu katika mlima huo kupitia utafiti wa kisayansi utakaofanywa na shirika hilo.

Kwa upande wake Mkuu wa Mkoa wa Arusha Mrisho Gambo aliwaomba viongozi wa serikali kutoa ushirikiano kwa wataalamu hao watakaofanya utafiti katika mlima Kilimanjaro ili kuwawezesha kufanya kazi yao kwa ufasaha kwakuwa suala hilo litaleta manufaa kwa taifa na sio mtu mmoja mmoja.

Mwisho.